Rakesh Dilbar
muddaton baad jo ham shahr men kal aa.e hain
ḳhair-maqdam se bhare radd-e-amal aa.e hain
kya gunahgaron ki fihrist hai aane vaali
kis liye aap ki peshani pe bal aa.e hain
vasl hi vasl hai ab hijr jahan likkha tha
qissa-e-ishq ka unvan badal aa.e hain
sab ko ye manzar-e-shab-tab dikhaya kis ne
aaj kal sab ke dimaghon men ḳhalal aa.e hain
pichha karte hue ham ek ghazal ka kal raat
‘mir’ ki dilli se punjab nikal aa.e hain
us ko ab karna ho jo tark-e-ta.alluq kar le
ham malal-e-dil-e-betab ugal aa.e hain
hazrat-e-qais hain ham-zad hamare ‘dilbar’
ham se milne ke liye pahle pahal aa.e hain
Leave a Reply