ye zamin chand sitaron ka badal kaise ho
sochta main bhi bahut kuchh huun amal kaise ho
surat-e-hal badal jaati hai ik lamhe men
aadmi apne iradon men aTal kaise ho
kin daraḳhton se laga rakkhi hai ummid-e-samar
shaḳh hi jab na ho sarsabz to phal kaise ho
sochte kuchh hain amal kuchh hai natija kuchh hai
aisi surat men koi mas.ala hal kaise ho
dard se koi ilaqa na ta.alluq gham se
sirf lafzon ke baratne se ghazal kaise ho
har mulaqat adhuri rahi is uljhan men
ya.ani iz.har-e-mohabbat men pahal kaise ho
mere mahbub ka urdu se hai rishta kam-kam
mainun aandi na.iin punjabi te gal kaise ho
Leave a Reply