sadaqaton ke dahakte sho.alon pe muddaton tak chala kiye ham
zamir ko thapthapa ke aḳhir sula diya aur ḳhush rahe ham
rida-e-giriya pe ta-qayamat nisar hote rahenge dariya
sabil-e-ḳhun-e-jigar se nadar sahilon ko bhigo chale ham
safar tha jab raushni ki janib to phir ma.al-e-safar ka kya gham
charagh ki tarah saari shab shaan se jale sub.h bujh ga.e ham
‘fuzail’ sha.er mudir naqqad sab ba-zahir the ham hi lekin
hamare andar tha aur ik shaḳhs jis se paiham laḌa kiye ham
Leave a Reply