koi avaz na aahaT na ḳhayal aise men
raat mahki hai magar ji hai niDhal aise men
mere atraf to girti hui divaren hain
saya-e-umr-e-ravan mujh ko sambhal aise men
jab bhi chaḌhte hue dariya men safina utra
yaad aaya tire lahje ka kamal aise men
aankh khulti hai to sab ḳhvab bikhar jaate hain
sochta huun ki bichha duun koi jaal aise men
muddaton ba.ad agar samne aa.e ham tum
dhundle dhundle se milenge ḳhad-o-ḳhal aise men
hijr ke phuul men hai dard ki baasi ḳhushbu
mausam-e-vasl koi taaza malal aise men
Leave a Reply