Poet
bandh kar kamar jab bhi ham pa-e-safar nikle
zindagi ke sab raste teri rahguzar nikle
sochte hain kyon aḳhir zauq-e-sajda-rezi men
ham jahan jabin rakkhen vo tira hi dar nikle
jo the napne vaale zaḳhm-e-dil ki gahra.i
apni shoḳh nazron se kitne be-ḳhabar nikle
sochte hain kya hoga haal phir baharon ka
shahr-e-lala-o-gul se ham jo ruuTh kar nikle
vaqt ke andhere men ziist ki siyahi men
raushni ke afsane kitne muḳhtasar nikle
husn aarzu kis ki ishq mudda.a kis ka
is hujum-e-hairan men donon be-ḳhabar nikle
ham jinhen samajhte the narm-ru hasin saa.e
vo savad-e-sahra ki tez dopahar nikle
mai-kade ke darvaze band ho ga.e ‘nazim’
tishnagi muqaddar ki le ke ham jidhar nikle
Leave a Reply