Anees Ansari
dil par yunhi choT lagi to kuchh din ḳhuub malal kiya
puḳhta umr ko bachchon jaise ro ro kar behal kiya
hijr ke chhoTe gaanv se ham ne shahr-e-vasl ko hijrat ki
shahr-e-vasl ne niind uḌa kar ḳhvabon ko pamal kiya
uthle kuen bhi kal tak paani ki daulat se jal-thal the
ab ke badal aise sukhe naddi ko kangal kiya
suraj jab tak Dhaal raha tha sona chandi ankhon men
bhiiḌ men sikke ḳhuub uchhale sab ko mala-mal kiya
lekin jab se suraj Duuba aisa ghor andhera hai
saa.e sab ma.adum hue aur ankhon ko kangal kiya
saḳht zamin men phuul ugate to kahte kuchh baat hui
hijr men tum ne aansu bo kar aisa kaun kamal kiya
aḳhir men ‘ansari’-sahab apne rang men Duub ga.e
us ko dua di us ko chheḌa shahr abiir gulal kiya
Leave a Reply