ankhen khuda ne bakhshi hain rone ke vaste
do kashtiyan mili hain dubone ke vaste
uryan chalun main qabr men sone ke vaste
kaafi hai mujh ko post bichhaune ke vaste
kushton ke khet men jo huzur aaj hans pade
moti ke daane mil gae bone ke vaste
niind ud gai hai rang-e-talai ki yaad men
paras ka surma chahiye sone ke vaste
afsun se samri ko jalate hain vasl men
jaadu jaga rahe hain vo tone ke vaste
tadpa main khaak par to kiya charkh ne karam
bijli girai mere bichhaune ke vaste
khvabidgan-e-khak hain giryan mazar par
soton ki ankhen khul gaiin rone ke vaste
ye ghul ke mar gaya huun ki mera kafan tamam
jaala bana hai qabr ke kone ke vaste
jiina hai sab ko maut hai tasvir ki tarah
naqshe jame hue hain na hone ke vaste
sangin dili se champai rangon ki hai chamak
sang-e-mahak zarur hai sone ke vaste
goya zaban huun dahan-e-rozgar men
kya kya maze mile mujhe khone ke vaste
naqsh-e-nagin-e-mohr mira naqsh-e-ab hai
paida hua huun naam dubone ke vaste
danton ke ishq men hai ye ighraq-e-laghari
dauda huun motiyon ke pirone ke vaste
chakki lagi hai bosa-e-husn malih ki
zakhmon ke munh khuli hain salone ke vaste
maila hai farsh par to mah-e-aj mai-kasho
laao sharab chandni dhone ke vaste
shayad karenge chashma-e-khurshid men vo ghusl
shabnam chali hai paani samone ke vaste
us husn-e-pur-namak men ajab hai numud-e-khat
dekha hujum-e-mor salone ke vaste
qarun ka bhi khazana luta dijiye ‘munir’
mumsik ka maal lutiye khone ke vaste