Ahmad Kamran
koi mansab koi dastar nahin chahiye hai
shahzadi mujhe darbar nahin chahiye hai
akhiri ashk se is sog ki takmil hui
ab mujhe koi aza-dar nahin chahiye hai
is takalluf se ziyada ka talabgar huun main
sirf ye saya-e-divar nahin chahiye hai
ab muqabil mire apne hain sau ai rabb-e-jalil
hausla chahiye talvar nahin chahiye hai
chahiye hai mujhe inkar-e-mohabbat mire dost
lekin is men tira inkar nahin chahiye hai
akhir aaza ne mire saath baghavat kar di
ab qabile ko ye sardar nahin chahiye hai
Leave a Reply