sauda-mohammad-rafi

Tujh Bin Bahut Hi Katti Hai Auqat Be-Tarah

tujh bin bahut hi katti hai auqat be-tarah

jun-tun ke din to guzre hai par raat be-tarah

hoti hai ek tarah se har kaam ki jaza

aamal-e-ishq ki hai mukafat be-tarah

bulbul kar us chaman men samajh kar tuk ashiyan

sayyad lag raha hai tiri ghaat be-tarah

puchha payam-bar se jo main yaar ka javab

kahne laga khamosh ki hai baat be-tarah

milne na dega ham se tujhe ek-dam raqib

pichhe laga phire hai vo bad-zat be-tarah

koi hi mor hai to rahe is men shaikh-ji

dadhi padi hai shane ke ab haath be-tarah

‘sauda’ na mil kar apni tu ab zindagi pe rahm

hai us javan ki tarz-e-mulaqat be-tarah

More Poems

Leave a Comment