ankhen kis ka khoj lagati rahti hain
shaklen apna aap chhupati rahti hain
aane vaale dinon ki dhundli tasviren
ga.e dinon ke ḳhvab dikhati rahti hain
mausam ke rudad raqam karne ke liye
shaḳhen apne haath kaTati rahti hain
miTTi kyuun rangon ko zahir karti hai
ḳhushbuen kyuun ḳhaak uḌati rahti hain
kaun hava.en hain jo lauh-e-alam par
ankhen chehra haath banati rahti hain
tanha.i men ḳhamoshi ki avazen
mujh ko mera naam batati rahti hain
saari raat gali ke ḳhali nukkaḌ par
tez hava.en lamp hilati rahti hain
Leave a Reply