gudaz-e-dil se mila sozish-e-jigar se mila
jo qahqahon men ganvaya tha chashm-e-tar se mila
ta.alluqat ke ai dil hazar pahlu hain
na jaane mujh se vo kis nuqta-e-nazar se mila
kabhi thakan ka kabhi faslon ka rona hai
safar ka hausla mujh ko na ham-safar se mila
main dusron ke liye be-qarar phirta huun
ajiib dard mujhe mere chara-gar se mila
har inqalab ki tariḳh ye batati hai
vo manzilon pe na paaya jo rahguzar se mila
na main ne soz hi paaya na istaqamat hi
hajar hajar ko TaTola shajar shajar se mila
‘hafiz’ ho gaya aḳhir ajal se ham-aghosh
tamam shab ka sataya hua sahar se mila
Leave a Reply