kya ḳhabar jo nazar aata hai vo manzar hi na ho
ye samundar kahin sach-much men samundar hi na ho
jis ki ummid pe sar phoḌ rahi hai duniya
kahin is ahani divar men vo dar hi na ho
jaan kar phuul jise dil se laga.e hue hain
ghaur se dekh len chhu kar use patthar hi na ho
dar-o-divar se ye kaise nazar aate hain
jis ko virana samajh baiThe hain vo ghar hi na ho
is qadar ham ko Darana nahin achchha ‘at.har’
kya pata ham ko kisi chiiz ka phir Dar hi na ho
Leave a Reply