had-e-nazar se mira asman hai poshida
ḳhayal-o-ḳhvab men lipTa jahan hai poshida
chala main janib-e-manzil to ye hua ma.alum
yaqin guman men gum hai guman hai poshida
palak pe aa ke sitare ne dastan kah di
jo dil men aag hai us ka dhuan hai poshida
ufuq se ta-ba-ufuq hai sarab phaila hua
aur is sarab men saara jahan hai poshida
sitara kya mujhe aflak ki ḳhabar dega?
nazar se us ki to mera jahan hai poshida
tu ḳhud hai ḳhar-o-zabun hirs-o-az-e-duniya men
khulega tujh pe kahan jo jahan hai poshida
main aankh khol ke takta huun duur tak ‘anvar’
ki DhunD luun jo mira ashiyan hai poshida
Leave a Reply