yuun dekhne men to uupar se saḳht huun shayad
magar darun-e-badan laḳht laḳht huun shayad
mire nasib men likkhi hai shab ki tariki
main Dubte hue suraj ka baḳht huun shayad
qarib o duur nahin hai koi bhi apna sa
ujaaḌ baagh ka tanha daraḳht huun shayad
mujhe kisi ne suna hi nahin tavajjoh se
main bad-zaban sada-e-karaḳht huun shayad
nahif kandhon pe bar-e-gham-e-do-alam hai
sarapa raahu o ketu ka taḳht huun shayad
miri talash men hai koi aisa lagta hai
kisi ka gum-shuda ‘shadab’ raḳht huun shayad
Leave a Reply