Chand Akbarabadi
tu kaash mile mujh ko akeli to bata.un
suljhe miri qismat ki paheli to bata.un
aane se tire pahle ḳhabar de di hava ne
ankhon pe mire rakh tu hatheli to bata.un
mahke hain tire jism ki ḳhushbu se faza.en
naraz na hon champa chameli to bata.un
kyon tere muqaddar men nahin meri mohabbat
dikhla.e tu be-rang hatheli to bata.un
viraniyan tanha.iyan mausam hai ḳhizan ka
anvar karo dil ki haveli to bata.un
chehre pe mire raaz TaTola na karo tum
hamraz bane aankh nashili to bata.un
iz.har-e-mohabbat ki talab dil men liye huun
tanha jo mile teri saheli to bata.un
ankhon men tiri yaad kahin zaḳhm na kar de
nikle ye agar phans nukili to bata.un
Leave a Reply