jab utre chand angan men to raten baat karti hain
vo chehra ḳhubsurat hai vo ankhen baat karti hain
safar ka hausla kaafi hai manzil tak pahunchne ko
musafir jab akela ho to rahen baat karti hain
shajar jab muzmahil hon phuul hon shaḳhon pe afsurda
udaas angan men divaron se shamen baat karti hain
miri ankhon se ninden le ke tum ne ratjage baḳhshe
mire takiye mire bistar se raten baat karti hain
shajar bhi jhumte hain jab hava.en gungunati hain
parinde lauT aate hain to shaḳhen baat karti hain
Leave a Reply