ameer-minai

Tera Kya Kaam Ab Dil Mein Gham-E-Jaanana Aata Hai

tira kya kaam ab dil men gham-e-janana aata hai

nikal ai sabr is ghar se ki sahib-khana aata hai

nazar men teri ankhen sar men sauda teri zulfon ka

kai pariyon ke saae men tira divana aata hai

vafur-e-rahmat-e-bari hai mai-khvaron pe in rozon

jidhar se abr uthta hai su-e-mai-khana aata hai

lagi dil ki bujhae bekasi men kaun hai aisa

magar ik girya-e-hasrat ki be-tabana aata hai

unhin se ghamze karti hai jo tujh par jaan dete hain

ajal tujh ko bhi kitna naz-e-maashuqana aata hai

pareshani men ye aalam tiri zulfon ka dekha hai

ki ik ik baal par qurban hone shana aata hai

chhalak jaata hai jam-e-umr apna vae-nakami

hamare munh talak saaqi agar paimana aata hai

vo but hi mehrban sab apna apna haal kahte hain

lab-e-khamosh tujh ko bhi koi afsana aata hai

tilism-e-taza tera saya-e-divar rakhta hai

badalta hai pari ka bhes jo divana aata hai

ye azmat rah ke zahid in buton men ham ne paai hai

ki kaaba ham ko lene ta-dar-e-mai-khana aata hai

do-rangi se nahin khali adam bhi surat-e-hasti

koi hoshyar aata hai koi divana aata hai

huma yuun ustukhvan-e-sokhta par mere girta hai

tadap kar shama par jaise koi parvana aata hai

udhar hain husn ki ghaten idhar hain ishq ki baten

tujhe afsun to mujh ko use pari afsana aata hai

kaleja haath se ahl-e-tamaa ke chaak hota hai

sadaf-asa agar mujh ko mayassar daana aata hai

namak jallad chhidka chahta hai mere zakhmon par

maze ka vaqt ab ai himmat-e-mardana aata hai

zabardasti ka dhadka vasl men tum ko samaya hai

kidhar ho hosh men aao koi aaya na aata hai

ilahi kis ki sham-e-husn se raushan hai ghar mera

ki ban jaata hai jugnu aaj jo parvana aata hai

vo ashiq khal-o-khat ka huun nazr-e-mor karta huun

mayassar tisare din bhi jo mujh ko daana aata hai

‘amir’ aur aane vaala kaun hai gor-e-ghariban par

jo raushan shama hoti hai to haan parvana aata hai

More Poems

Leave a Comment