ik mahakte gulab jaisa hai
khub-surat se khvab jaisa hai
main use padhti huun mohabbat se
us ka chehra kitab jaisa hai
be-yaqini hi be-yaqini hai
har samundar sarab jaisa hai
main bhatakti huun kyuun andheron men
vo agar aftab jaisa hai
Dubti jaae ziist ki naav
hijr lamha chanab jaisa hai
main haqaeq bayan kar dungi
ye gunah bhi savab jaisa hai
chain milta hai us se mil ke magar
chain bhi iztirab jaisa hai
ab ‘shabana’ mire liye vo shakhs
ek bhule nisab jaisa hai