ḳhushi kaise mire dil ki chhupa.i jaane vaali hai
ki mahfil teri aamad pe saja.i jaane vaali hai
diya hai daagh ye kah kar mujhe ab bevafa.i ka
vafa ki rasm duniya se uTha.i jaane vaali hai
muḳhalif samt chalti hai muafiq hi nahin rahti
hava se dosti kab tak nibha.i jaane vaali hai
hamesha hakim-o-jabir daba kar jis ko rakhte the
vahi avaz haq ki phir uTha.i jaane vaali hai
payam-e-dilbari dil ke sahife par likha main ne
likhi tahrir par dil se miTa.i jaane vaali hai
agar tum ye samajhte ho mujhe tum bhuul jaoge
haqiqat tum ko duniya men dikha.i jaane vaali hai
suna bhaa.i ko bhaa.i se alag hona hai lazim ab
na.i divar rishton men uTha.i jaane vaali hai
dabe paanv main teri go kahani se nikal aa.i
na ab ye zindagi ‘shamsa’ nibha.i jaane vaali hai
Leave a Reply