Poet
har lamha ham ne baat rakhi hai ye dhyan men
ik dastan aur bhi hai dastan men
yaron ne ek aan men mujh ko gira liya
kotah rah gaya tha main apni uḌaan men
kilen si chubh rahi hain badan men shuaon ki
kis ne kiye hain chhed mire sa.eban men
ankhon ki ḳhamushi men samundar ka shor tha
luknat si paḌ ga.i thi hamari zaban men
lete hain saans bhi to zara soch soch kar
ham log rah rahe hain kisi ke makan men
kis ne bikher di hain faza men udasiyan
kis ne bhara hai dard parinde ki taan men
kuchh log ashk ashk the kuchh the misal-e-najm
kuchh gum hue zamin men kuchh asman men
ham naqd-e-jism-o-jan se ḳharidenge kya bhala
kuchh bhi to ab nahin hai tumhari dukan men
Leave a Reply