Har Lamha Humne Baat Rakhi Hai Ye Dhyan Mein

har lamha ham ne baat rakhī hai ye dhyān meñ

ik dāstān aur bhī hai dāstān meñ

yāroñ ne ek aan meñ mujh ko girā liyā

kotāh rah gayā thā maiñ apnī uḌaan meñ

kīleñ sī chubh rahī haiñ badan meñ shuāoñ kī

kis ne kiye haiñ chhed mire sā.ebān meñ

āñkhoñ kī ḳhāmushī meñ samundar kā shor thā

luknat sī paḌ ga.ī thī hamārī zabān meñ

lete haiñ saañs bhī to zarā soch soch kar

ham log rah rahe haiñ kisī ke makān meñ

kis ne bikher dī haiñ fazā meñ udāsiyāñ

kis ne bharā hai dard parinde kī taan meñ

kuchh log ashk ashk the kuchh the misāl-e-najm

kuchh gum hue zamīn meñ kuchh āsmān meñ

ham naqd-e-jism-o-jāñ se ḳharīdeñge kyā bhalā

kuchh bhī to ab nahīñ hai tumhārī dukān meñ

Leave a Comment