Saeed Ahmad Akhtar
ye hadsa bhi to kuchh kam na tha saba ke liye
gulon ne kis liye bose tiri qaba ke liye
vahan zamin par un ka qadam nahin paḌta
yahan taraste hain ham log naqsh-e-pa ke liye
tum apni zulf bikhero ki asman ko bhi
bahana chahiye mahshar ke iltava ke liye
ye kis ne pyaar ki sham.on ko bad-dua di hai
ujaaḌ rahon men jalti rahen sada ke liye
abhi to aag se sahra paḌe hain raste men
ye ThanDaken hain fasane ki ibtida ke liye
sulag raha hai chaman men bahar ka mausam
kisi hasin ko avaz do ḳhuda ke liye
Leave a Reply