Salim Shuja Ansari
mujhe jab bhi kabhi teri kami mahsus hoti hai
tiri ḳhushbu tiri maujudgi mahsus hoti hai
yahi in.aam hai shayad miri chehra-shanasi ka
ḳhud apni shakl bhi ab ajnabi mahsus hoti hai
yunhi be-kaif lamhon ke guzar jaane se kya hasil
kisi ka saath ho to zindagi mahsus hoti hai
kisi ki yaad ke jugnu safar men jhilmilate hain
andhere raston par raushni mahsus hoti hai
zaruri to nahin takmil se taskin ho jaa.e
samundar ko bhi aksar tishnagi mahsus hoti hai
tasavvur ki zamin par fasl ugti hai sarabon ki
nami hoti nahin lekin nami mahsus hoti hai
na jaane kaun sa rishta hai apne darmiyan ‘salim’
tu ḳhush hota hai to mujh ko ḳhushi mahsus hoti hai
Leave a Reply