aaj un ka mizaj barham hai
ya muqaddar men ek naya ḳham hai
chalte chalte main thak gaya lekin
raat baaqi hai raushni kam hai
koi tanha.i si hai tanha.i
char-su ek hu ka aalam hai
saaqi chup-chap mai-kada suuna
saaz ki lai bhi aaj maddham hai
daagh dil ke dikha.un main kis ko
apna apna har ek ka gham hai
dil ke a.ine men jahan dekha
goya dil ek saghar-e-jam hai
choli daman ka saath hai un ka
zindagi hai jahan vahan gham hai
ashiyane ka ab ḳhuda-hafiz
baghban ka mizaj barham hai
kaun ḳhush-baḳht aaj yaad aaya
aankh kyon ye tumhari pur-nam hai
aate honge ‘habib’ vo shayad
dard pahle se aaj kuchh kam hai
Leave a Reply