taḳhatub hai tujh se ḳhayal aur ka hai
ye nukta vafa men baḌe ghaur ka hai
vo ḳhalvat men kuchh aur jalvat men kuchh hai
karam us ka mujh par ajab taur ka hai
mira chehra bhi mera chehra nahin hai
ye ehsan mujh par mire daur ka hai
ye nafrat mohabbat ka radd-e-amal hai
ki mujh se taqaza tire jaur ka hai
na.e daur ki ibtida ka hai zamin
ki dil aa.ina gosha-e-saur ka hai
karachi men bhi mo’atabar ho raha hai
suḳhan men jo andaz lahore ka hai
Leave a Reply