Rahat Hasan
aag kya sard hui barf ko paani kar ke
ham bhi dariya hue mahsus ravani kar ke
puchhiye kis se ki viran hue ghar kaise
har koi ḳhush hai yahan naql-e-makani kar ke
in isharon ki kanayon ki haqiqat ma.alum
ham ne alfaz ko dekha tha ma.ani kar ke
ik na.e din ki shuruat hui jaati hai
qaflo aage baḌho ḳhatm kahani kar ke
log rakhte hain zara.at se zaminen ḳhush-rang
ham bhi dekhen kisi poshak ko dhani kar ke
qadr-o-qimat men izafe ki talab thi jin ko
vahi masrur hain ashiya ki girani kar ke
yuun hi karte rahe jiddat ka gila to ‘rahat’
har kisi chiiz ko rakh doge purani kar ke
Leave a Reply