tasavvur kar-farma tha ki lazzat thi kahani ki
isi tasvir ne ankhon pe jaise hukmarani ki
miri parvaz ka manzar abhi tiron se chhalni hai
lahu men tar-ba-tar hai dastan naql-e-makani ki
labon par barf jam jaa.e to istifsar kya ma.ani
ki shor-o-ghul faqat tamhid hai shola-bayani ki
qadam rakhte hi jaise khul gaya daldal men darvaza
ajab karigari dekhi yahan miTTi men paani ki
dikha.i raah sahil ki unhen pur-pech maujon ne
usi tufan ne kashti ke haq men badbani ki
bahut zarḳhez miTTi hai ‘nizam’ apne badan men bhi
havas ne phuul mahka.e lahu ne baghbani ki
Leave a Reply