abdul-mannan-tarzi

Main Pahuncha Apni Manzil Tak Magar Aahista Aahista

main pahuncha apni manzil tak magar ahista ahista

kiya hai puura ik mushkil safar ahista ahista

nahin asan harim-e-naz tak ki thi rasai bhi

hue taskhir lekin bam-o-dar ahista ahista

mata-e-azm-e-mohkam hi ka is ko moajiza kahiye

ki manzil ban gai khud rahguzar ahista ahista

bahut hi sakht garche zindagi ke maarke the bhi

khula hai mujh pe har bab-e-zafar ahista ahista

raha hai rishta aisa sang-o-tesha se ki le aaya

main ju-e-shir ik shirin ke ghar ahista ahista

hunar aisa charaghon ke dhuan piine se aaya hai

ki shabnam men badal jaate sharar ahista ahista

nahin kuchh kaam aai hai kisi ki kimiya-sazi

bane qatre pasine ke guhar ahista ahista

sitaron ko banana aftab asan nahin hota

kiye kuchh maarke aise bhi sar ahista ahista

sataish nukta-chini aur sile se be-niyazana

main bas chalta raha apni Dagar ahista ahista

faqat ik sai-e-paiham zindagi ka apni unvan hai

shab-e-tarik se phuti sahar ahista ahista

falak ke chand taron se raqabat bhi nahin lekin

kiya daman ko khud rashk-e-qamar ahista ahista

gul-o-ghuncha ki rang-o-bu men pa leta huun sab un men

khile hain is tarah dagh-e-jigar ahista ahista

hisar-e-na-shanasan ho ki bazm-e-nukta-chinan ho

mujhe aa hi gaya karna basar ahista ahista

main dilli lucknow men garche pahle hi se tha lekin

hua huun ghar men ‘tarzi’ mo’atabar ahista ahista

More Poems

Leave a Comment