jism ḳhamosh si tasvir hua jaata hai
ab tira hijr le ta.amir hua jaata hai
rabt jab ek ki taqdir se ho jaa.e to phir
kya kisi aur ki taqdir hua jaata hai
ruḳh ukere hue maazi ki kahani ke nuqush
ab gham-e-hijr ki tash.hir hua jaata hai
aks ubhre shab-e-furqat men jo divaron par
vaqt mere liye shamshir hua jaata hai
tu bhi ab dekh le is sabr ke daman ko sameT
zabt mera bhi ab aḳhir hua jaata hai
us ne jaane ka kaha main ne bhi roka hi nahin
kya kabhi paanv ki zanjir hua jaata hai
haa.e ghazlen tiri dil chiir ke rakh dengi ‘shahab’
chand arse men kahan ‘mir’ hua jaata hai
Leave a Reply