Arsh Malsiyani
vo hazir ho ki gha.eb ho nihan yuun bhi hai aur yuun bhi
sarasar raaz raz-e-kun-fakan yuun bhi hai aur yuun bhi
tahayyur hai huzuri men to betabi hai duuri men
musibat men ye jan-e-na-tavan yuun bhi hai aur yuun bhi
tamanna ki tarah tark-e-tamanna bhi musibat hai
ye duniya ik maqam-e-imtihan yuun bhi hai aur yuun bhi
vo aa kar bhi rulate hain vo ja kar bhi rulate hain
dil-e-nakam mashghul-e-fughan yuun bhi hai aur yuun bhi
uThaya naz-e-rahbar bhi junun bhi aazma dekha
magar barham nizam-e-karvan yuun bhi hai aur yuun bhi
jo dil men daagh raushan hain to ashk-e-ḳhun hai ankhon men
ye manzar-e-gulsitan dar-gulsitan yuun bhi hai aur yuun bhi
rahi jo barq se mahfuz pamal-e-ḳhizan hogi
gham-e-anjam-e-shaḳh-e-ashiyan yuun bhi hai aur yuun bhi
faqat kahne ko to hai kamyabi aur nakami
mohabbat fatah-e-kaun-o-makan yuun bhi hai aur yuun bhi
sitam ho ya karam donon ka ham par shukr vajib hai
jo apna mehrban hai mehrban yuun bhi hai aur yuun bhi
jo sun sakte ho tum sun lo nahin taqat to ham chup hain
hamen manzur apna imtihan yuun bhi hai aur yuun bhi
umid-e-silsila-dar-silsila lutf-o-davam is men
bahar-e-umr-e-fani javedan yuun bhi hai aur yuun bhi
ghaTa savan ki aur ai ‘arsh’ ilhamat ki barish
zamin par aaj faiz-e-asman yuun bhi hai aur yuun bhi
Leave a Reply