Suleman Khumar
dasht men ghaas ka manzar bhi mujhe chahiye hai
sar chhupane ke liye ghar bhi mujhe chahiye hai
thoḌi tadbir ki saughat hai matlub mujhe
aur thoḌa sa muqaddar bhi mujhe chahiye hai
tairne ke liye dariya bhi hai kaafi lekin
shauq kahta hai samundar bhi mujhe chahiye hai
sirf divaron se hoti nahin ghar ki takmil
chhat bhi darkar hai aur dar bhi mujhe chahiye hai
gaahe fōtpath bichha kar bhi main so ja.unga
gaahe ik maḳhmalin bistar bhi mujhe chahiye hai
teri ma.asum adaa.i bhi sar ankhon pe magar
tujh men ik shoḳh sitamgar bhi mujhe chahiye hai
chahiye hai kabhi rela bhi mujhe sardi ka
aur kabhi dhuup ka lashkar bhi mujhe chahiye hai
isti.are bhi zaruri hain suḳhan men lekin
sher men san.at-e-paikar bhi mujhe chahiye hai
guftugu kis se karen baunon ki basti men ‘ḳhumar’
baat karni hai to ham-sar bhi mujhe chahiye hai
Leave a Reply