ruḳh ki rangat gulab ki si hai
aur chamak aftab ki si hai
kam-sini men vo afat-e-jan hain
jo ada hai shabab ki si hai
aap ke hote huur ko chahen
kya vo surat janab ki si hai
ghunche men koi baat bhi kahiye
dahan-e-la-javab ki si hai
ankhen nargis laḌati hai ham se
ye bhi us be-hijab ki si hai
ai gul-e-tar tire pasine men
rang aur bu gulab ki si hai
na ho bavar to dekhen a.ina
shakl is men janab ki si hai
raushni mah-o-mehr-e-anvar men
kab ruḳh-e-la-javab ki si hai
abhi ubhre abhi miTenge ham
apni hasti habab ki si hai
kyuun na chumen tumhari surat ko
ye ḳhuda ki kitab ki si hai
tarz un ke sitam ki ai ‘sabir’
karam-e-be-hisab ki si hai
Leave a Reply