Siraj Faisal Khan
vo baḌe bante hain apne naam se
ham baḌe bante hai apne kaam se
vo kabhi aghaz kar sakte nahin
ḳhauf lagta hai jinhen anjam se
ik nazar mahfil men dekha tha jise
ham to kho.e hai usi men shaam se
dosti chahat vafa is daur men
kaam rakh ai dost apne kaam se
jin se koi vasta tak hai nahin
kyuun vo jalte hai hamare naam se
us ke dil ki aag ThanDi paḌ ga.i
mujh ko shohrat mil ga.i ilzam se
mahfilon men zikr mat karna mira
aag lag jaati hai mere naam se
Leave a Reply