Anwar Shadani
zindagi be-sar-o-saman hai qissa kya hai
jis ko dekho vo pareshan hai qissa kya hai
zulf aariz pe pareshan hai qissa kya hai
saya-e-kufr men iman hai qissa kya hai
aaj ke daur men bas chak-gareban hona
tere divanon ki pahchan hai qissa kya hai
ya tire husn ki tanvir se raushan hai jahan
ya mire ishq ka irfan hai qissa kya hai
zohd shibli-o-ghazali ka haya hafiz ki
haath men ‘mir’ ka divan hai qissa kya hai
azmat-bad-e-bahari mujhe taslim magar
phuul sharminda-e-ehsan hai qissa kya hai
apne anjam se kyon aaj ka insan ‘anvar’
jante bujhte anjan hai qissa kya hai
Leave a Reply