Poet
fughan-e-nim-shabi men koi asar de de
jo ho sake to duaon ka ab samar de de
visal-e-yar ki jis men charagh jalte hon
mire nasib ko aisa hi ik nagar de de
bas ik saval hai us ke buland mansab se
qafas-nasib ko mumkin hai koi ghar de de
main apne zaḳhm ḳhud apne lahu se sinchungi
mujhe qarar na de koi charagar de de
vo aankh bujh ga.i jis se charagh jalte the
tamam tiira gharon men koi ḳhabar de de
main ashiyane ke tinke saja.e baiThi huun
hava ke haath men nanha sa ik sharar de de
main us ke zarf ke baare men aur kya likkhun
jo apne sahn se duniya ko rahguzar de de
gunah savab ke saare hi rang hon us men
farishta chhoḌ ke mujh ko koi bashar de de
ye raat baḌh ga.i ‘iman’ koi ḳhuda ke liye
ḳhuda se kah do ki lillah hamen sahar de de
Leave a Reply