lafz be-jan hain mire ruh-e-ma.ani mujhe de
apni taḳhliq se tu koi nishani mujhe de
tera bhi naam rahe main bhi amar ho ja.un
aisa unvan koi aisi kahani mujhe de
chal rahi hai baḌi shiddat se yahan sard hava
mujh ko bujhne se bacha soz-e-nihani mujhe de
ye hasin peḌ ye ḳhushbu miri kamzori hai
din ka sab maal tira raat ki raani mujhe de
mera mushkil hai safar tere sahare ke baghair
rukne lag ja.un agar main to ravani mujhe de
is qadar dhandli achchhi nahin umr-e-rafta
mera bachpan na sahi meri javani mujhe de
mujhe andesha hai is bhiiḌ men auron ki tarah
tu bhi kho ja.ega apna koi saani mujhe de
‘ram’ har ik ke malik se guzarish hai to ye
saaf lahja mujhe de sada-bayani mujhe de
Leave a Reply