Poet
nok-e-shamshir ki ghaat ka silsila yuun pas-e-a.ina kal utara gaya
meri pahchan ke aks jitne bane koi zaḳhmi hua koi maara gaya
ghair-mahsus raston se aati rahi ik sada vapsi ki mire kaan men
goya gunge isharon ki dahliz par mujh ko ankhon se us din pukara gaya
ye na puchhe koi mausam-e-rang ki pahli pahli adavat ne kya dukh diye
phuul ki aag par shab guzari ga.i ḳhaar ki nok par din guzara gaya
aaj us ke lahu ki har ik buund ke zard hone pe ḳhushiyan mana.i ga.iin
kuchh dinon pahle jis rahnuma ke liye chand taron se rasta sanvara gaya
aap pi pi ke lamhon ki sab barishen zindagi ke makan par barasti rahin
is liye to pighal kar mire jism ki saari miTTi ga.i saara gaara gaya
vo jo unche mahal the mire samne ghaur se un ko dekha to mujh par khula
kin manaron se chandi chura.i ga.i kin manaron se sona utara gaya
Leave a Reply