dikhai dene Ke Aur dikhai Na dene Ke darmiyan Sa Kuchh

Abdul Ahad Saaz

dikhai dene ke aur dikhai na dene ke darmiyan sa kuchh

khayal ki la-makaniyon men ubhar raha hai makan sa kuchh

koi taayyun koi tayaqqun nazar ko mahdud rakh sake jo

falak se niche bahut hi niche bana hai ik saeban sa kuchh

numu ka tufan tha afrinash ki zad pe ham tum khade the donon

tumhen bhi kuchh yaad aae shayad mujhe to aata hai dhyan sa kuchh

havaen vabastagi se pur hain faza pe maujudgi hai taari

navah-e-jan men lahak raha hai base-basae jahan sa kuchh

kahin ye manzar men qaid lamhe kahin ye lamhon men qaid manzar

rasai ki azmaishon men rihai ka imtihan sa kuchh

andhere kaghaz ki vusaton men kahin kahin raushni ke dhabbe

ye sai-e-tajsim-e-na-bayani ye ishtibah-e-bayan sa kuchh