miri jaan ranj ghataiye qadam aage ab na badhaiye
idhar aaiye idhar aaiye idhar aaiye idhar aaiye
khade kab se ham sar-e-rah hain kahin mar chuken ki tabah hain
hadaf-e-khadang-e-nigah hain zara aankh idhar bhi milaiye
bhala aana aap ka kaam hai ye ghalat tamam kalam hai
aji bas hamara salam hai kahin aur baten banaiye
tah-e-tegh tez hai ik jahan koi kushta hai koi nim-jan
jo na ho daregh tu mehrban koi haath idhar bhi lagaiye
kabhi mai se munh ko na modiye havas-e-sharab na chhodiye
sar-e-mohtasib hai na todiye jo kamal-e-ghaiz par aaiye
ye kamal-e-lutf hai saqiya yahi hai havas yahi muddaa
rahe hosh-e-sar na khayal-e-pa agar aisi mai hai to laiye
jo vufur-e-chashm-e-pur-ab ho to jahan takhta-e-ab ho
abhi nuuh ka sa azaab ho agar ashk chand bahaiye
vo kaha adu se hai main ne kya ki hue hain aap jo yuun khafa
ye ghazab ye jhuut ye iftira mire samne to bulaiye
ghazal aisi kamil-e-vazn sun mutafailun mutafailun
hai ‘nasim’ taqat-e-hosh sun koi sher aur sunaiye
Leave a Reply