Kis Fikr Kis Khayal Mein Khoya Hua Sa Hai

kis fikr kis khayal men khoya hua sa hai

dil aaj teri yaad ko bhula hua sa hai

gulshan men is tarah se kab aai thi fasl-e-gul

har phuul apni shakh se tuuta hua sa hai

chal chal ke thak gaya hai ki manzil nahin koi

kyuun vaqt ek mod pe thahra hua sa hai

kya hadisa hua hai jahan men ki aaj phir

chehra har ek shakhs ka utra hua sa hai

nazrana tere husn ko kya den ki apne paas

le de ke ek dil hai so tuuta hua sa hai

pahle the jo bhi aaj magar karobar-e-ishq

duniya ke karobar se milta hua sa hai

lagta hai us ki baton se ye ‘shahryar’ bhi

yaron ke iltifat ka maara hua sa hai

Leave a Comment