Jamuna Parsad Rahi
bujhe bujhe se sharare hain zard shaḳhon par
saja gaya hai koi apna dard shaḳhon par
safir-e-shab ka koi ashk DhunDte honge
hava ke jalte hue honT sard shaḳhon par
ayaan hai rang-e-taghazzul gulon ke chehron se
bayaz-e-rang nahin fard fard shaḳhon par
lapeTe nuur ki chadar men dard ke saa.e
bhaTak raha hai koi shab-navard shaḳhon par
hava ki god men mauj-e-sarab bhi hogi
girenge phuul to Thahregi gard shaḳhon par
piye hue hain shajar intiha-e-karb ka sam
ki hai numud-e-gul-e-la-javard shaḳhon par
urus-e-bu-e-baharan ne kya shararat ki
ki hain safir-e-saba ḳhud-nabard shaḳhon par
vo ik uḌaan men shohrat ka asman Thahra
simaT ke rah ga.e baton ke mard shaḳhon par
Leave a Reply