sama.at ke liye ik imtihan hai
ḳhamoshi in dinon misl-e-bayan hai
safar apne hi bhitar kar raha huun
mira Thahrav muddat se ravan hai
havas shamil hai thoḌi si dua men
abhi is lau men halka sa dhuan hai
naya ik ḳhvab dekhen aur ro.en
ab itni taab ankhon men kahan hai
uḌa deti hai apni ḳhaak jab tab
zamin ki justuju bhi asman hai
tabhi aahon ke sur uThte hain is se
hamara soz-e-jan hi saz-e-jan hai
hamesha duur se dekha kiya huun
jahan mujh ko javahir ki dukan hai
mira kirdar is men ho gaya gum
tumhari yaad bhi ik dastan hai
mohabbat ek kashti muḳhtasar si
tamannaon ka dariya be-karan hai
main saare fasle tai kar chuka huun
ḳhudi jo darmiyan thi darmiyan hai
‘bakul’ ḳhvabon ke panchhi aa base hain
hamara ashiyan ab ashiyan hai
Leave a Reply