Al-Aman Al-Aman

Naz Butt

subh se shaam tak

silsila ziist ka

kis qadar hai kathin kis qadar be-aman

lamha lamha sisakti huui zindagi

har qadam par bilakti huui zindagi

khvahishon ki asiri pe nauha-kunan

har ghadi jism-o-jan

ruuh ghayal kharashon ke dil par nishan

roz-e-avval se jari-o-sari yahan

vahshaton ka saman

koi pal bhi aziyyat se khali nahin

kaun si aankh hai jo savali nahin

koi varis nahin koi vaali nahin

gulshan-e-khvab ka koi maali nahin

khatm hota nahin shor-e-ah-o-fughan

hai azal se abad tak yahi dastan

al-aman al-aman!!