Mahtab Haider Naqvi
muTThiyon men ret bhar li hai bata.un kis tarah
raat din ab-e-ravan se munh chhupa.un kis tarah
raqs karte hain bagule mere tere darmiyan
ret par dariyaon ka naqsha bana.un kis tarah
vo udhar us paar ke manzar bulate hain mujhe
raushni ke shahr se pichha chhuḌa.un kis tarah
yaad sab kuchh hai magar kuchh bhi nazar aata nahin
putliyon men tere chehre ko chhupa.un kis tarah
jab yahan is shahr men sab kuchh ḳhizan-asar hai
be-dar-o-divar ka ik ghar bana.un kis tarah
Leave a Reply