har-chand ki insaf ka ḳhvahan bhi vahi hai
qatil bhi vahi aur nigahban bhi vahi hai
barbadi-e-gulshan ka jo saman bana tha
barbadi-e-gulshan pe pasheman bhi vahi hai
hai nisbat-e-naumidi-e-tariki-e-shab jo
ik muzhda-e-ummid-e-farozan bhi vahi hai
paani men talatum bhi usi chand ke baa.is
aur apni ada dekh ke hairan bhi vahi hai
tat.hir-e-siyasat ka bhi da.ava hai usi ko
tanqid-e-hukumat se gurezan bhi vahi hai
mushkil hai mafar vahshat-e-tanha.i se ‘irfan’
jo qarya hai abad bayaban bhi vahi hai
Leave a Reply