dilli se vapsi
rukhsat ai dilli tiri mahfil se ab jaata huun main
nauhagar jaata huun main nala-ba-lab jaata huun main
yaad aenge mujhe tere zamin-o-asman
rah chuke hain meri jaulan-gah tere bostan
tera dil dhadka chuke hain mere ehsasat bhi
tere aivanon men gunje hain mire naghmat bhi
rashk-e-shiraz-kuhan hindostan ki aabru
sar-zamin-e-husn-o-mausiqi bahisht-e-rang-o-bu
maabad-e-husn-o-mohabbat bargah-e-soz-o-saz
tere but-khane hasin tere kalisa dil-navaz
zikr yusuf ka to kya kiije tiri sarkar men
khud zulekha aa ke bikti hai tire bazar men
jannaten abad hain tere dar-o-divar men
aur tu abad khud shair ke qalb-e-ar men
mahfil-e-saqi salamat bazm-e-anjum barqarar
nazninan-e-haram par rahmat-e-parvardigar
yaad aaegi mujhe be-tarah yaad aaegi tu
ain vaqt-e-mai-kashi ankhon men phir jaegi tu
kya kahun kis shauq se aaya tha teri bazm men
chhod kar khuld-e-ali-gadh ki hazaron mahfilen
kitne rangin ahd-o-paiman tod kar aaya tha main
dil navazan-e-chaman ka chhod kar aaya tha main
ik nasheman main ne chhoda ik nasheman chhut gaya
saaz bas chheda hi tha main ne ki gulshan chhut gaya
dil men soz-e-gham ki ik duniya liye jaata huun main
aah tere mai-kade se be-piye jaata huun main
jaate jaate lekin ik paiman kiye jaata huun main
apne azm-e-sarfaroshi ki qasam khata huun main
phir tiri bazm-e-hasin men laut kar aunga main
aunga main aur ba-andaz-e-digar aunga main
aah vo chakkar diye hain gardish-e-ayyam ne
khol kar rakh di hain ankhen talkhi-e-alam ne
fitrat-e-dil dushman-e-naghma hui jaati hai ab
zindagi ik barq ik shoala hui jaati hai ab
sar se pa tak ek khunin raag ban kar aunga
lala-zar-e-rang-o-bu men aag ban kar aunga
Leave a Reply