jo miTa hai tere jamal par vo har ek gham se guzar gaya
huiin jis pe teri navazishen vo bahar ban ke sanvar gaya
tiri mast aankh ne ai sanam mujhe kya nazar se pila diya
ki sharab-ḳhane ujaḌ ga.e jo nasha chaḌha tha utar gaya
tira ishq hai miri zindagi tire husn pe main nisar huun
tira rang aankh men bas gaya tira nuur dil men utar gaya
ki ḳhirad ki fitnagari vahi luTe hosh chha ga.i be-ḳhudi
vo nigah-e-mast jahan uThi mira jam-e-zindagi bhar gaya
dar-e-yar tu bhi ajiib hai hai ajiib tera ḳhayal bhi
rahi ḳham jabin-e-niyaz bhi mujhe be-niyaz bhi kar gaya
tire diid se ai sanam chaman arzuon ka mahak uTha
tire husn ki jo hava chali to junun ka rang nikhar gaya
mujhe sab ḳhabar hai mire sanam ki rah-e-‘fana’ men hayat hai
use mil ga.i na.i zindagi tire astan pe jo mar gaya
Leave a Reply