dar-e-faqir pe jo aa.e vo dua le jaa.e
dava-e-dard koi dard-e-la-dava le jaa.e
visal-e-yar ki ab sirf ek surat hai
hamari ḳhaak uḌa kar vahan hava le jaa.e
to jaan jaa.e mira dukh jo tere pahlu se
koi bhi aa.e tire dost ko uTha le jaa.e
kisi jazira-e-nadida ki talab thi hamen
ab is pe hai ki jahan ham ko naḳhuda le jaa.e
zamana-saz hai ‘fartash’ us ke kya kahne
ki ḳhud hi qatl kare aur ḳhun-baha le jaa.e
Leave a Reply