duur tak raah men kanTe hain bahut
mere bhi chahne vaale hain bahut
ghar se niklo na badal kar chehre
shahr men a.ina-ḳhane hain bahut
kya chhupen ḳhushbuen rusva.i ki
pyaar ke phuul mahakte hain bahut
aur kuchh bhi nahin apne bas men
yaad kar ke tujhe rote hain bahut
tu bhi tanha hai bichhaḌ kar ham se
ham bhi ai dost akele hain bahut
ik tujhi se hai sarokar hamen
yuun to allah ke bande hain bahut
‘mauj’ iz.har-e-mohabbat ke liye
ankhon ankhon men ishare hain bahut
Leave a Reply