para.i aag men yuun jal-bujhe sharar mere
khule na mujh pe bhi ahval beshtar mere
hai zard rengte sayon ki zad men shaḳh-e-gulab
tum aa.e ho bhi to kis rut men aaj ghar mere
saza vajud se bhi qabl ho chuki maqsum
ḳhabar na rakh miri is darja be-ḳhabar mere
chhaton pe saya-kunan bel jal ga.i hogi
sulag uThe hain kuchh is taur bam-o-dar mere
hamare beach sarabon ka ek rishta tha
kahan bichhaḌ ga.e sahra men ham nazar mere
vo raakh banti hui guunj men sitara-bar
sirhane kaun pareshan tha rat-bhar mere
utar rahi thi kiran barf ki chaTanon par
chala gaya vo mujhe ḳhvab saunp kar mere
guzar ga.i shab-e-yalda to ye hua ma.alum
surang paar bhi dushman the ham-safar mere
dayar-e-bad-e-junub ai dayar-e-bad-e-junub
tujhe sukun to hai gul bikher kar mere
main taaq taaq huun ‘shahin’ kab se sham.a-ba-kaf
ki ziina ziina vo utre kabhi to ghar mere
Leave a Reply