guzre lamhon ke dobara panne khol rahi huun main
thoḌe qisse yaad hain mujh ko thoḌe bhuul ga.i huun main
roz sub.h uTh jaaya karte hain mujh men kirdar ka.i
par bistar se ḳhud ko tanha uThte dekh rahi huun main
socha hai main dard chhupa lungi apne asani se
siine men jasus chhupa hai ye kyuun bhuul rahi huun main
ek sabab ye bhi hanste hanste chup ho jaane ka
apne uupar zimmedari zyada oḌh chuki huun main
isi liye be-sabr huun us ke man ki baten sunne ko
apne man ki saari baten us se bol chuki huun main
Leave a Reply